GenBronnen

maas

land van Kessel - inv. 1597 - rekeningen Derix van der Horst 1461


transcriptie door: Rien van den Brand

niet gekontroleerd

geplaatst met toestemming van Rien van den Brand anno okt. 2013

 

Bron: geldersarchief.nl

toegang 001 Graven en hertogen van Gelre

financieel beheer – rekeningen – rekeningen overkwartier

8 ambtman en scholt van het land van Kessel en (ter) Horst (inv. nrs. 1576-1602)

 

inv. nr. 1597

 

[afbeelding 0001-1597_001 + 002]

 

[25 maart - 13 juli 1461]

Dit is rekeninghe ende bewijsinghe myns Derix van der Horst, Amptman stlantz van Kessell ende ter Horst van allen upboeren

ende uytgeven, dat ick van wege myns genedigen lieven heren van Gelre ende van Gulich ende Greve van Zutphen opgeboirt

ende uytgegeven hebbe aengaende op onser lieuver vrouwen dach Annunciatio in den jair onss heren (M) CCCC LXI  (1461)

ende uitgaende op sente Margarete dach in den selven jaeren, die tijt is eyn verdell jairs ende III weken.

 

Item soe ist te weten dat in opboeren ende uytgeven van der heerlicheit van der Horst myne gen. here, die helfft gerkent wordt,

die synen genaden aengeit.

Iten so en reeckene ick in dess reeckeningh geen jair rinthen toe der Horst.

 

Primo Horst

Item aldair geboirt van den molenen XIX malder rogge,

tmalder ad XVI stuver, maickt XV rynse gulden IIII stuve

Item II malder bueckwietz, tmalder ad XII stuver, maickt I rynse gulden IIII stuver.

Item van Jacob Luydincks suster van eer fftalen geboirt  X stuver

Itemvan Heynken Kuper van Bekermans guede geboirt van gewynne I rynse gulden

Item van Claes Spykermans in den Hegelschemer velde van gewynne 1 rynse gulden V stuver

Item Derick die Moelner hadd my woirde toegesacht, der hij nyet en hielde, dair ick hinder bij hadde, gecomponiiert by raedt der

scepenen myt XII rynse gulden, maickt myns gen. here deil VI rynse gulden

Summa lateris XXX ryns gulden III stuver.

 

[afbeelding 0001-1597_003]

 

Kessell ende Helden

Item Gadert van Holtmoelen hadde syne naeberen van eynen eerffpaet gekeert ende oir beesten op die gemeynt geschutt,

 gecomponiert by raet der scepenen myt XLV rynse gulden.

Item van Jan Moelener van Ruremunde geboirt van gewynne IIII rynse gulden VIIJ stuver.

Item van Gerit Metten van gewynne geboirt  V stuver

Item tot Helden van nyen tijnse geboirt I rynse gulden

Item van Claes Byeregge van gevecht V mck (?) valet I rynse gulden II stuver III oirtken.

 

Baerle nyet geboirt

 

Brede ende Blederick

Item Peter Aechten ende Thijs Cluyt hadn eenen doetslach gedaen, geboirt van Peters gereder haven XX rynse gulden.

Item van Tys gereder haven geboert X rynse gulden

Item tot Brede van nyen tynse geboirt XIIII stuve I oirtken

Item tot Blederick van Mychiel Roesen leerhoyt ende Lyske Lyntsen omme dat sy nyet gewaickt en hadden, geboirt twie V mck

(?) valet II rynse gulden V stuver II oirtken.

Summa lateris valet LXXXIIII rynse gulden XVI stuver.

 

Seuenhem

Item aldair van nyen tijnse geboirt I rynse gulden

Item van II morgen landts, die Claes van Meerle verkocht hadd to gewynne geboirt IIII rynse gulden.

Item van Jan van Nydeggen ende Jan den Groete van gevechte geboirt twie V mck (?) valet II rynse gulden VJ stuver.

Item van Coenrartz knaep Ingeen Holt van gevecht V mck (?) valet I rynse gulden II stuver III oirtken

Item Trijn Wittmekers ende Jennesken Schoemekers van eerftalen twie V mck (?) valet II rynse gulden VJ stuver.

Item Wilhem Moelner end Claes Weiden van eerfftalen twie V mck (?) valet II rynse gulden V stuver II oirtken.

Item Reynker Wever van eerfftalen twie V mck (?) valet II rynse gulden V stuver II oirtken.

 

Swolgen Lotthem

Item Jentken op den Berghe hadde den van Broickhusen bijer gefoert in der Venlentsche beden, gecomponiert myt XXV rynse

gulden.

Item van den van Lotthem omme dat sy in der beden voir Venle nyet en dorffte trecken, geboirt XXV rynse gulden.

Item in der selver mate van hon geboirt XXV malder haveren, tmalder ad X stuver, maickt XIIJ rynse gulden.

Item van den laeten tot Lotthem van oirdelgelde, dat Gerit van Scheelberch onder on liggende hadde, geboirt VIII rynse gulden.

Item van den selven Gerit vn Scheelberh ende van Derick van der Weyen van eerfftalen twie V mck (?) maickt II gulden VJ stuver.

Item van der abdissen renthen van Nuyss, die myn gen. here dair jairlix uyt geldende heefft gboert X stuver.

Summa lateris LXXXVIII rynse gulden X stuver I ortken stuvers.

 

[afbeelding 0001-1597_004]

 

Wanssem

Item Peter van Scheelbergh was beruchticht van duysteren sake ende wairt dair omme vluchtich, gecomponiert by raedt der

scepenen myt XII rynse gulden.

Item van des selven Peters guede geboirt XIJ malder rogge, tmalder ad I rynse gulden maickt XIJ rynse gulden.

Item XII malder evenen, tmalder ad VIIJ stuver, maickt IIIIJ rynse gulden.

Item VIII malder boickwietz, tmalder ad XI stuver, maickt IIII rynse gulden VIII stuver.

Item sijn schaep, sijn byen ende II cleyn pertken verkocht tsamen voir XVI rijnse gulden.

 

Raede

Item Heyn van Danss hadd Jan Bosshuys in synen huse gesucht ende geslagen, was dair van vluchtich woirden, gecomponiert

by raedt der scepenen myt XXX rynse gulden.

Item Peter van Lobick was eyn van den VII, die tot Raide uytgehalden woirden, doe my genedige here myt den ruteren dair was,

gecomponiert by raedt der scepenen myt XI rynse gulden.

Item Peter Bandts was deser oick een, gecomponiert by raedt der scepenen myt V rynse gulden VII stuver.

Item Peter Goertz was der oick eyn, gecomponiert by raedt der scepenen myt XII rynse gulden.

Item Jan Belen was deser oick een, den hebn myns here genade tot Ruremunde quijt gegeven, soe en rekene ick dair nyet aff.

Item Peter van der Geelt was oick een van de soeven, den myn genedige heren den deeken van Zutphen to lieve quijt gaff.

Item soe hadde oick eyn man to Ray knijne in den schueren gevangen, dairomme gegeven XVIII malder haveren, dair voirgeboirt

 IIII rynse gulden.

Summa lateris valet I C X rynse gulden XV stuver.

 

Item soe is den scholtz ende mij so voir ende nae geschenckt:

Item Harman Scheres VI rynse gulden ende VIII malder haveren, omme geleyde te hebn, tmalder ad VI stuver valet tsamen VIII

rynse gulden VIII stuver.

Item Claes Sluyske X malder haveren, Thijs van Kessell VI malder haveren, Jan van Bracht VIII malder haveren, Peter Aechten

VIII malder haveren vlet XXXII malder haveren, tmalder ad VI stuver, maickt IX gulden XII stuver.

Summa lateris XVIII rynse gulden.

Summa summarum van allen upboiren voirscr., beloept tsamen III C XXXII rynse gulden IIII stuver I ortken stuver.

 

[afbeelding 0001-1597_005 + 006]

 

Dat is uytgeven myns Dericks van der Horst, Ampman etc., dat ick van wege myns lieve genedige here van Gelre ende van

Gulick, etc. uytgegeven hebbe benne deser voirge(noemde) tijt:

 

Item myn gen. lieve here geefft my jairlix van mynen Ampt te waeren ende van des huyss gehaldtz wege ter Horst C rynse gulden,

maickt nae beloip der tijt XXX rynse gulden.

Item soe geefft mij myn lieue gen, here jairlix van den gelde, dat ick van sijnre genade wege geworven hebbe ende Arnt van

Meersen gegeven ende uyter den Ampt geloest hebbe nae uytwysinghe myns Amptsbrieffs I C LII rynse gulden XII stuvr, maickt

nae beloip der tyt XLVII rynse gulden IIII stuver.

Item myn lieve gen. here geefft my jairlix van den Scholtz Ampt to verwaeren L rynse gulden, maickt nae beloup der tyt XV rynse

gulden V stuver.

Item voir my rouvoeder jairlix X rynse gulden, maickt nae beloup der tyt III rynse gulden II stuver.

Item tot mynen perden jairlix LX malder haveren, tmalder ad VIIJ stuver, maickt nae beloup der tyt VI rynse gulden IX stuver IIJ oirtken.

Item voir mynen brant jairlix VIIII rynse gulden, maickt nae beloup der tyt II rynse gulden XIIII stuver.

Item den porter voir synen cost ende loen jairlix XXI rynse gulden, maickt nae belopu der tyt VI rynse gulden IX stuver IIJ oirtken.

Item den moelener voir syner cost ende loen XI rynse gulden, maickt nae beloup der tyt III rynse gulden IIII stuver.

Summa lateris ende totalis van allen uytgeven voirscr. beloept tsamen na uutwisnge dess parten IC XIIII rynse gulden VIII stuver I ort

stuver.